（如有雷同，實屬不幸）
鍾老爺有一妻四妾，最新收嘅四姨太美艷能幹又幫得屋企手（係個鼻高D啫...）鍾家一向奉行「一家四制」，各房河水不犯井水，共同效忠鍾老爺。
不過四姨太曾經寄人籬下為奴為婢，深感自由同為自己前途作主之可貴，眼見社會仍然有咁多「妹仔」，決定加入為「妹仔」爭取權利。
四姨太此舉惹來鍾老爺不滿。鍾老爺道，屋企無野你做、無錢你駛？點解要拋頭露面？我喺英國讀Law考Bar，法律嘅野你識咩？畜婢合理合法，你而家爭取嘅野不但違法，仲影響埋頭家！如果Mr Robinson因為咁唔支持我選華人商會代表，經濟損失邊個負責？
同時間，三姨太眼見呢個好機會，日日喺大太太面前舉出四姨太嘅「惡行」，包括唔乖啦，搞到屋企嘈嘈閉唔和諧啦，教壞晒D仔女唔聽老爺話啦，勾結外面人黎反老爺啦...令原本不問世事嘅大太太忽然勁憎四姨太，仲同老爺講佢再唔收斂就要施行家法，唔係頭家就失控囉喎。
至於一向自閉的格格二姨太，一心只等佢舊情人帶佢私奔移民返京城，對呢頭家搞成點一於好少理，反正佢不嬲唔鍾意呢度，都係貪有錢揾啫。
咁班仔女 Charles, Jimmy 同 Elaine 又如何？讀番書嘅第二代，眼見亞美利堅喺上世紀中已經廢除黑奴，無理由我地屋企咁西化仲要support D 大清律例架？所以佢地一致企四姨太嗰邊。咁當然激到老爺同大太太紮紮跳啦，話你班細路讀咁多書都唔顧全大局，萬一人地衝擊英政府拉埋你地點算？
班仔女同四姨太話，咁好啦，我地集合埋鍾氏一族叔伯兄弟，一齊商討下要點向政府提出方案推動「妹仔權」，然後至決定要點做，夠和平啦？
鍾老爺反駁，你地自己閂埋門唔知傾D乜，就整出幾個proposal 叫人揀，你地唔係唔知我地氏族另外幾房人最鍾意搞事，根本而家你地做嘅野已經俾你班激進嘅堂兄弟姐妹騎劫晒啦，最終都係會失控架！"This is all illegitimate and farcical!"，鍾老爺以牛津英語大喊。
大仔Charles回應，Dad，我英文無你講得咁好，不過我地之前就方案商討過幾次，次次都出notice 邀請全族人出席，無話「閂埋門」唔俾你參與啊，咁請問你當初為何唔參與討論，而家反指我地制定方案嘅方法不民主呢？
大太太此時出聲，我唔知你班後生咁多野，我都唔支持「妹仔權」點會去你地D商討日啫？我只係唔鍾意你地班激進嘅堂兄弟姐妹搞三搞四得唔得吖？我地都係為你好，為鍾家好。爭取到「妹仔權」唔通英政府會多謝你，班「妹仔」會感激你咩？有咩人比得上父母咁關心你地想你地好？
之前俾阿爸摑到懵下懵下嘅Jimmy忍唔住開口，爸，大媽，我認我爭取「妹仔權」係有私心，我鍾意左采月，我唔想第時我地生嘅BB，你地嘅孫，要做人地「妹仔」。而家都只係嘗試爭取，成唔成功都係未知，點解要搞成咁敵我分明？我地爭取失敗的話，最大得益者會係邊個？點解會有人一方面攻擊我地嘅行動，但另一方面又話佢地爭取緊同一個目標，卻毫無其他實際更好嘅建議？
三姨太趁機插嘴，哎呀老爺大姐你地睇下，作反啦，采月勾引Jimmy搞到佢迷迷懵懵，做埋D敗壞家聲之事。我早就話四妹係黎攞債架啦，佢入門咁耐我地就亂足咁耐，以前點會咁架老爺，一家人不知幾和諧安樂。老爺你唔可以再縱容四妹啦。
一向文靜嘅Elaine開口，三媽，我讀英國歷史，就算皇帝都係得一個皇后，並無後宮三千。點解我地會咁亂，其實同中國歷代一樣，皇室外戚作亂，挑撥事非，從中得益。我地而家身處英政府管治，我相信好快唔單只「妹仔」，連「重婚」都會有人爭取廢除，只係時間問題啫。
三媽還未來得及發作，四姨太終於開口，老爺、大姐、三姐，我知道我而家所做嘅事唔會得到你地認同，而因為我搞到你地同Charles、Jimmy同Elaine關係咁緊張都唔係我想見到。不過我想講，就算我地一家置身事外，繼續閂埋門自己開開心心就算，世界仍然每日運行，每日改變。你覺得我地亂黎，但起碼我地行動每一步都透明公開，更何況到現時為止都只係選擇緊方案啫，如果港督肯順應民意回應，我地未必要走到最後一步。你愛我地所以唔想我地犯險，但係外頭嗰D聲稱都係爭取緊「妹仔權」，但只懂說我地行動係「毀滅性」嘅人，佢地最終為邊個好？既然唔想我地做D「毀滅性」嘅行動，咁佢地除左攻擊我地仲做過D乜？
假設我地鍾氏一族最終唔會有任何行動，是否代表社會從此和諧安寧？「和諧」並非由老爺你一個說了算，亦非從拒絕做任何野而得來。你地唔好忘記，「妹仔權」其實為嘅係邊個？係一班佔人口大多數嘅「妹仔」。我地嘅社會華洋集處，信息發達，一班妹仔遲早會知道，外面嘅世界包括英國，女仔可以讀書識字，自己出黎做野養活自己，甚至有權揀邊個做總統。你認為一班「妹仔」會認命，會逆來順受到幾時？如果我地今次咁和平提出訴求都被漠視打壓，接下來會發生咩事，更加難說。一日社會仍然靠不平等嘅制度維持權力，所謂嘅「和諧」、「穩定」，根本只係表面嘅假像，同起喺沙上面嘅堡壘一樣，唔知幾時，一D最微不足道嘅事情發生都能夠粉碎呢種「偽和諧」。
-------------------------------------
劇情發展到呢度，岩岩一粒鐘，欲知後事如何，就要等下一集啦...Meanwhile，記得去TVB Fun 投下神聖一票！
